Þórhildur Sunnar Ævarsdóttir, fyrrum þingkona Pírata, spyr hvenær fólk ætli að hætta að setja Stefán Einar Stefánsson, umsjónarmann Spursmála Morgunblaðsins, á verðlaunapall fyrir skoðanir hans.
Vísar Þórhildur Sunna þar til orða sem Stefán Einar lét falla um þá ákvörðun borgarstjórnar að draga fána Palestínu að húni við ráðhús Reykjavíkur. Stefán Einar var ekki sáttur við ákvörðunina og lét þung orð falla í færslu sinni á Facebook. Kallaði hann Alexöndru Briem borgarfulltrúa Pírata, sem er trans kona, kynskipting.
„Stefán Einar, sem margoft hefur opinberað innræti sitt, en nýtur vinsælda meðal álitsgjafa þessa lands sem „fíla hvað hann er beinskeittur“upplýsir okkur enn og aftur um myglað innrætið er hann skrifar af fúsum og frjálsum vilja um samstöðugjörning Reykjavíkurborgar með þolendum þjóðarmorðs í Palestínu“, segir Þórhildur Sunna og vísar til orða hans:
„Þarna sést meðal annarra Alexandra Briem á myndinni. Hún er kynskiptingur. Við vitum hvernig stjórnvöld í Palestínu fara með hennar líka. Þeir myrða það fólk köldu blóði.“
Hún óskar þess að Hamas-dauðasveitirnar hafi sigur á því samfélagi! Hversu heimskt getur fólk orðið þegar það trommar upp stuðning við fólk sem vill það feigt og hatar það heilu hatri fyrir það sem það er? Er farið að bjóða upp á aðgerðir í heilbrigðiskerfinu þar sem heilinn er tekinn úr fólki en ekki maginn eða önnur líffæri?“
Spyr Þórhildur Sunna:
„Hvenær hættir fólk að setja þetta illgjarna hrekkjusvín á einhvern verðlaunapall?“
