„Ég er nógu gamall til að muna þegar New York-búar endurupplifðu 11. september án þess að kjósa það,“ skrifaði einn stuðningsmanna Trump og forsetinn deildi síðan þessari færslu.
Mamdani, sem er sósíallisti, vann öruggan sigur yfir Andrew Cuomo, fyrrum ríkisstjóra í New York.
En hver er þessi ungi maður sem kom mjög á óvart í forvali Demókrataflokksins?
Margir stjórnmálaskýrendur telja að hann geti orðið sá forystumaður sem Demókrata hefur vantað síðustu ár.
Margir tala um að hann verði hugsanlega leiðtogi flokksins en aðrir hafa efasemdir um það. Ástæðan er að hann er hin fullkomna staðalímynd hræðslumyndarinnar sem MAGA vill gjarnan mála af Demókrataflokknum.
Mamdani er 33 ára og af indverskum ættum en fæddur í Úganda. Hann er bandarískur ríkisborgari en getur ekki orðið forseti af því að hann fæddist ekki í Bandaríkjunum.
En þrátt fyrir að hann geti ekki orðið forseti hafa fjölmiðlar og stjórnmálaskýrendur velt því fyrir sér hvort hann geti orðið sá forystumaður sem getur tryggt Demókrötum sigur í forsetakosningunum 2028.
Aðgerðasinnar á hægri væng stjórnmálanna hafa verið iðnir við að deila gömlum ummælum Mamdani á samfélagsmiðlum. Þetta eru meðal annars ummæli um Ísrael, ofbeldi lögreglunnar og sósíalisma. Axios skýrir frá þessu.
„Fyrir 24 árum drap hópur múslima 2.753 manns þann 11. september. Nú er múslímskur sósíalisti á leið til að stýra New York, sagði Charlie Kirk, sem er áhrifaríkur áhrifavaldur innan MAGA.
Samsæriskenningasmiðurinn Laura Loomer, sem stendur Trump nærri, sagði (án þess að leggja fram nokkrar sannanir) um að sigur Mamdani muni hafa fleiri hryðjuverk í för með sér í New York.
