Damir Muminovic hélt á vit ævintýranna eftir að hafa unnið Íslandsmeistaratitilinn með Breiðabliki síðasta haust og lék með DPMM frá Brúnei í vetur. Aðdragandinn af því var áhugaverður.

Damir, sem er 35 ára gamall, er nú kominn aftur heim í Blika og getur spilað í næsta mánuði. Hann hélt að það væri verið að grínast í sér þegar honum bauðst að koma til DPMM, sem spilar í deildinni í Singapúr.

„Þetta er níu liða deild og við spiluðum fjórum sinnum við öll liðin. Þetta var mjög skemmtilegt,“ sagði Damir í Dr. Football um veturinn. En hvernig kom þetta til?

„Ég fæ símtal á Instagram frá einhverjum. Katrín (Ásbjörnsdóttir unnusta Damirs) sagði mér að svara þessu ekki, þetta væri bara eitthvað bull. Svo hætti gæinn ekki að hringja í mig svo ég svaraði. Gæinn spurði mig hvort ég vildi koma til Brúnei að spila fótbolta. Ég skellti á en hann gafst ekkert upp.

Þetta hljómar eins og bull,“ sagði Damir, en að lokum varð þetta að veruleika.

Damir lék alla leikina eftir komuna til DPMM, en hans lið hafnaði í 5. sæti deildarinnar. Hér neðst má sjá hann tala um skiptin til DPMM og veruna þar.