Lögreglan á Norðurlandi eystra greindi frá því í gærmorgun að á miðvikudagskvöld hefði verið farið í samræmdar lögregluaðgerðir á nokkrum stöðum á landinu þar sem framkvæmdar voru húsleitir að undangengnum úrskurðum frá Héraðsdómi Norðurlands eystra.
Kom fram í tilkynningu lögreglu að hún hefði um nokkurt skeið unnið að rannsókn á skipulagðri glæpastarfsemi sem talin er tengjast fíkniefnaframleiðslu. Tók lögregla fram að með aðgerðum hafi verið unnt að staðfesta þessar grunsemdir.
Sjá einnig: Húsleitir víða í gær og farið fram á gæsluvarðhald í dag
Eitt þessara húsa sem rannsókn lögreglu beindist að er á Raufarhöfn og ræðir Morgunblaðið í dag við íbúa á svæðinu sem segja að ýmislega skrýtið hafi verið í gangi í umræddu húsi.
Haft er eftir einum íbúa að húsið hafi verið selt fyrir þremur eða fjórum árum og rætt hafi verið um það meðal íbúa að þar ætlaði eldri maður að búa einn.
„Fólk fór fljótlega að taka eftir því að það var alltaf bíll sem kom einu sinni í mánuði um nótt og var svo farinn eldsnemma morguns,“ er haft eftir íbúanum í frétt Morgunblaðsins.
Þá hafi menn tengdir húsinu komið á um það bil tveggja vikna fresti og leikið sig „heimska“ þar sem þeir þóttust ekki tala neitt tungumál og borguðu alltaf með peningum.
Í frétt Vísis í gær kom kom fram að íbúar á Raufarhöfn hefðu lýst því að erlendur maður hefði búið í húsinu síðasta árið, líklega einstaklingur frá Austur-Evrópu. Einhverjir sögðu það þó koma á óvart enda hefði lítið sem ekkert farið fyrir honum.
