Vesturmiðstöð Reykjavíkurborgar, sem er til húsa að Austurstræti 8-10, er ein fjögurra miðstöðva í Reykjavík þar sem íbúar Reykjavíkurborgar geta nálgast fjölbreytta þjónustu, upplýsingar og ráðgjöf. Þar er meðal annars veittur stuðningur við börn, ungmenni, fjölskyldur, aldraða og fatlaða.

DV hefur borist ábending um tíð veikindaleyfi hjá starfsmönnum Vesturmiðstöðvar sem þeir rekja til aðbúnaðar, þ.e. loftgæða á vinnustaðnum. Hafa þeir grun um að mygla í húsnæðinu valdi þessu.

DV spurðist fyrir um þetta hjá Hólmfríði Helgu Sigurðardóttur, upplýsingafulltrúa hjá Reykjavíkurborg. Hún segir skoðun á húsnæðinu ekki hafa leitt í ljós vísbendingar um myglu. Hins vegar hafi skort á virkni loftræstingar. Einnig kemur fram í skriflegu svari Hólmfríðar að um bráðabirgðahúsnæði sé að ræða:

„Í mars síðastliðnum skoðaði starfsmaður af Eignaskrifstofu Reykjavíkurborgar húsnæði Vesturmiðstöðvar í Austurstræti 8–10, að beiðni velferðarsviðs, í kjölfar þess að nokkrir starfsmenn höfðu lýst yfir áhyggjum af innivist. Það var gert samkvæmt verklagsreglum sem unnið er eftir hjá Reykjavíkurborg.

Engar vísbendingar fundust um myglu í þeirri skoðun. Hins vegar kom í ljós að loftræsting var ekki í fullri virkni og ekki var nægilega loftræst með gluggum. Tekin var ákvörðun um að láta þrífa húsnæðið vel, gera átak í að lofta út og þá var óskað eftir því að Fasteignafélagið Reitir, sem er eigandi hússins, léti yfirfara loftræstingu og kæmi framvegis reglulega til að fylgjast með virkni loftræstikerfisins. 

Húsnæðið í Austurstræti 8–10 er bráðabirgðahúsnæði fyrir Vesturmiðstöð. Leit stendur nú yfir að nýju húsnæði.“