Í þættinum kom fram að Björgólfur Thor Björgólfsson, fjárfestir og ríkasti Íslendingurinn hefði greitt fyrir njósnir á mönnum sem stóðu að hópmálsókn gegn honum.
Um var að ræða njósnir yfir nokkurra mánaða tímabil árið 2012 og var starfandi og fyrrverandi lögreglumönnum meðal annars greitt fyrir njósnirnar.
Meðal þeirra sem tóku þátt í þeim voru Jón Óttar Ólafsson, fyrrverandi rannsóknarlögreglumaður og Guðmundur Haukur Gunnarsson lögmaður, en þeir störfuðu báðir fyrri embætti sérstaks saksóknara áður en þeir stofnuðu fyrirtækið PPP.
Ólafur Þór sagði í samtali við mbl.is í gærkvöldi að málið væri áfall fyrir embættið.
„Við teljum að það sem þarna er verið að lýsa sér þvert gegn öllum gildum og siðferði innan lögreglunnar. Í okkar huga er þetta afar slæmt tilvik og erum í rauninni í hálfgerðu áfalli yfir þessu öllu,“ er haft eftir honum.
Fram kom í þættinum að Jón Óttar og Guðmundur Haukur hefðu látið af störfum hjá embætti sérstaks saksóknara í byrjun árs 2012 í kjölfar ásakana um brot í starfi. Voru þeir kærðir fyrir að stela og selja gögn frá embættinu til þrotabús. Ríkissaksóknari fellti kæruna niður en í þætti Kveiks í gærkvöldi kom fram að kæran hefði enn verið til meðferðar þegar fyrirtæki þeirra, PPP, tók að sér verkefnið fyrir Björgólf.
Ólafur segir við mbl.is að um leið og grunur um eitthvað misjafnt hefði átt sér stað á sínum tíma hafi verið brugðist við með kæru og rannsókn. Hann segir að ríkissaksóknari hafi þegar tekið upp rannsókn á málinu sem fjallað var um í Kveik í gærkvöldi.
