Arnar Gunnlaugsson sagði frá því í þættinum A&B á Stöð 2, sem fjalla um hann og tvíburabróður hans Bjarka, að verkalýðsleiðtoginn Vilhjálmur Birgisson hafi verið drifkrafturinn á bak við óvænta ráðningu á þeim í starf þjálfara ÍA 2006.

Arnar og Bjarki tóku við af Ólafi Þórðarsyni eftir erfiða byrjun á tímabilinu. Voru þeir enn leikmenn á þessum tíma og höfðu aldrei þjálfað áður. „Við vorum bara langt frá þeirri hugsun að vera þjálfarar. Datt það ekki í hug. Gleymdu hugmyndinni. Mig minnir að Vilhjálmur Birgisson, núverandi verkalýðsfrömuður, hafi verið með mesta drifkraftinn á bak við þessa hugmynd, að við myndum taka við,“ sagði Arnar meðal annars í A&B.

Vilhjálmur tjáir sig um þetta í færslu á Facebook nú í kvöld. „Haha þeir eru dásamlegir þessir eðaldrengir Arnar og Bjarki, en það er rétt ég átti hugmyndina árið 2006 að fá þá bræður til að taka við Skagaliðinu en á þessum tíma var ég stjórnarmaður hjá knattspyrnufélagi ÍA. Rétt að minna á að árið 2006 vorum við í bullandi fallsæti og þurftum að gera erfiðar breytingar,“ skrifar hann.

„En þessu símtali við Arnar Gunnlaugsson árið 2006 gleymi aldrei, en þegar ég hringdi og spurði hann hvort þeir bræður væru tilbúnir til að taka við Skagaliðnu við þessar erfiðu aðstæður var svarið já. Þá spurði ég þennan snilling hvað kostið þið bræður en á þessum tíma var fjárhagsstaða félagsins alls ekki góð. Svarið frá Arnari var ótrúlegt, ekkert Villi við gerum þetta frítt fyrir okkar uppeldisklúbb sem hefur gert svo margt fyrir okkur og svo kom frá Arnari, Villi hvenær er næsta æfing þarf að hringja í Bjarka bróðir og láta hann vita!“

Arnar og Bjarki áttu svo eftir að bjarga Skagamönnum frá falli þetta sumarið. Vilhjálmur rifjar í pistli sínum upp að hann hafi sagt við Arnar að hann mætti aldrei gleyma því hver uppgötvaði hæfileika hans í þjálfun. Flestir þekkja það hversu langt Arnar, landsliðsþjálfari Íslands, hefur náð síðan, þó hann hafi upplifað hæðir og lægðir á leiðinni.