Tómas Þór Þórðarson og Davíð Þór Viðarsson settust í settið í Íþróttavikunni með Benna Bó sem sýnd er á föstudögum á Hringbraut. 

Karlalandsliðið var til umræðu, sem og landsliðsþjálfarinn Arnar Þór Viðarsson. Hann hefur legið undir gagnrýni lengi en Ísland átti fína leiki gegn Venesúela og Albaníu á dögunum. 

„Gagnrýni er af hinu góða en maður þarf að taka svona hluti inn í myndina þegar talað er um gæði landsliðsins,“ segir Davíð, en hann er bróðir Arnars. 

„Hann hefur fengið sinn skerf af gagnrýni. Ég er auðvitað langt frá því að vera hlutlaus í þessu máli. En mér finnst hann hafa staðið sig mjög vel. Í öllu þessu fjaðrafoki sem var í kringum landsliðið fyrir ári síðan, þá stóð hann keikur og tók á móti spurningunum. Það var enginn annar frá sambandinu sem var að bakka hann upp. Hann fær þetta í fangið, gerir það eins vel og hann getur. Mér finnst aðdáunarvert hvernig hann hefur tæklað þessa gagnrýni, mér finnst hann vera að komast á fínan stað með þetta landslið.“  

Davíð er afar stoltur af bróður sínum. „Þetta var mín helsta fyrirmynd þegar ég var yngri og er það enn í dag. Ég veit alveg hvaða mann hann hefur að geyma. Ég hef mjög mikla trú á honum og er ótrúlega stoltur af honum.“ 

Í vikunni staðfesti Vanda Sigurgeirsdóttir, formaður KSÍ, að hún hafi rætt við Heimi Hallgrímsson í sumar og tekið stöðuna á honum. 

„Ég hef eiginlega enga skoðun á því. Það er bara hennar að svara fyrir það ef hún vill svara fyrir það,“ segir Davíð við því. 

Tómas Þór skilur vöndu vel. „Hún er ekki að vinna vinuna sína ef hún er ekki að athuga hvað er í boði. Þó að þetta hafi verið góðar 45 mínútur er tölfræðin ekki með honum í liði.“