Um 91 prósent þeirra barna sem eiga rétt á gjaldfrjálsum tannlæknum er nú skráð hjá heimilistannlækni. Þetta kemur fram í eftirfylgniskýrslu Ríkisendurskoðunar um átaksverkefni um tannlækningar fyrir börn tekjulágra forráðamanna.
Ríkisendurskoðun beindi því til velferðarráðuneytisins árið 2014 að það léti rannsaka tannheilsu barna og að ráðuneytið beitti sér fyrir því að fleiri börn yrðu skráð hjá heimilistannlæknum. Ríkisendurskoðun telur að mikill árangur hafi náðst í skráningu barna og ungmenna hjá heimilistannlæknum, en til marks um það voru 64 prósent barna og ungmenna skráð hjá heimilistannlæknum árið 2014. Sem fyrr segir hefur það hlutfall hækkað í 91 prósent.
