Kári Árnason, fyrrum landsliðsmaður og yfirmaður knattspyrnumála hjá Víkingi, myndi ekki spila eins fótbolta með landsliðið og fyrrumm samstarfsmaður hans Arnar Gunnlaugsson leggur upp með.

Arnar tók við landsliðinu í byrjun árs eftir að hafa unnið stórkostlegt starf í Víkinni. Í Íþróttavikunni hér á 433.is var Kári spurður út í leikstíl liðsins.

„Þetta er aðeins öðruvísi (leikstíll í landsliðsbolta), ég hef margoft sagt það. Þú ert ekki að taka neina sénsa eða gefa liðum eitt eða neitt, því það er erfiðara að skora í þessu. Þetta er enginn rokk og ról fótbolti. Liðin liggja oft til baka og beita skyndisóknum. Þeir verða bara að læra þetta, það á ekki að taka svona langan tíma,“ sagði Kári um leikstíl liðsins.

Kári var algjör klettur í liði Íslands sem fór á EM 2016 og HM 2018, liðið spilaði einfaldan en árangursríkan fótbolta.

„Arnar gerir það sem hann vill, ég myndi gera þetta öðruvísi. Ég er líka allt annar maður en Arnar og það er ekkert rétt sem ég er að segja. Hann er með þá á æfingu alltaf og sér meira af þeim. Hann gerir það sem hann telur rétt og þekkir, hefur reynslu af.“

Íslenska liðið mætir Aserbaísjan á föstudag í undankeppni HM og nokkrum dögum síðar eru það Frakkar á útivelli. „Þetta eru mjög mismunandi leikir. Ef hann mætir naive inn í Frakka-leikinn gæti það endað mjög illa.“

„Landsliðið er bara árangur núna strax. Þar af leiðandi þarf þetta að vera pínu einfalt svo þú hefur ekki tíma til að vera í þessum Pep-bolta. Þú hefur ekki tímabil eftir tímabil, þessir leikmenn eru að eldast, bráðum eigum við ekki varnarlínu lengur því þeir verða bara komnir á hækjur.“