Guðmundur Benediktsson var gestur í þáttunum Návígi á dögunum þar sem verið var meðal annars að ræða um Óskar Hrafn Þorvaldsson þjálfara KR.

Guðmundur hefur lengi stýrt umræðu um Bestu deild karla og eitt sumarið þegar Óskar var að stýra Breiðablik þá fékk hann símtal.

„Menn voru að velta ýmsum steinum í þáttunum og þá fæ ég símtal frá Óskari. Hann segir að ég þurfi að fara að skoða þessa sérfræðinga, þeir viti ekkert hvað þeir eru að tala um. Að þeir viti ekkert hvað hann sé að gera þarna,“ segir Guðmundur í þættinum.

Óskar Hrafn vildi fá alla sérfræðinga þáttarins á fund sinn og útskýra hvað hann væri að reyna að gera með Breiðablik

„Óskar sagðist vera með hugmynd og vildi boða þá alla á fund á miðvikudeginum klukkan 17:00, í stúkunni í Smáranum. Hann ætlaði að vera með töflufund og útskýra hvað hann væri að gera, hann sagði mér að boða þá.“

Sérfræðingar Stúkunnar hjá Sýn höfðu lítinn áhuga á þessum fundi en Sigurvin Ólafsson sem stýrir Þrótti í dag mætti hins vegar á svæðið.

„Ég held að það hafi bara einn mætt. Ég hefði viljað að allir hefðu mætt, sá maður sem mætti var Sigurvin Ólafsson sem var þá í þáttunum hjá okkur. Hann fór á þennan fund og lærði held ég mikið, hann sagði mér það strax í kjölfarið að honum fannst þetta frábært. Af því að Óskar er ekki að fela neitt sem hann er að gera, hann er ekki í feluleik. Hann er klár í að útskýra fyrir öllum hvað er að gerast.“

„Sigurvin talaði um það að þetta hefði verið frábært fyrir sig, sjálfur að þjálfa og fá svona nákvæmlega hvað Óskar vildi gera með lið Breiðabliks og sýndi honum allt.“