Wayne Rooney telur að hugarfarið og hræðslan hafa orsakað tap Arsenal gegn PSG í Meistaradeild Evrópu í gær. Paris Saint-Germain vann ansi sterkan útisigur á Arsenal í fyrri leik liðanna í undanúrslitum Meistaradeildarinnar.
Gestirnir byrjuðu leikinn mun betur og kom Ousmane Dembele þeim yfir á 4. mínútu. Lið Arsenal vaknaði aðeins til lífsins þegar leið á fyrri hálfleik og kom Mikel Merino boltanum í netið snemma í þeim seinni. Var markið þó dæmt af vegna rangstöðu.
Meira var ekki skorað í leiknum og sanngjarn 0-1 sigur PSG staðreynd, en Arsenal komst aldrei almennilega í takt við leikinn og hefði sigur Frakkanna getað orðið stærri miðað við færin í restina. Seinni leikurinn fer fram í París á miðvikudaginn í næstu viku og er verk að vinna fyrir Arsenal.
„PSG var miklu betra liðið, taktíkin þeirra var frábær. Þeir vissu hvenær átti að pressa og hvenær átti að fara niður, þeir hefðu getað unnið með tveimur til þremur mörkum,“ sagði Rooney.
„Ég var svekktur með hvernig Arsenal spilaði og stuðningsmennina líka. Gegn Madríd voru þeir frábærir en í þessum leik heyrðist varla í þeim.“
„Leikmennirnir þurfa hjálp, ef þeir hefðu komið með sömu orku og gegn Madríd þá hefði það hjálpað.“
„Arteta reyndi að vera jákvæður en það er andleg hræðsla hérna að koma þessu ekki yfir línuna. Það er ótti, þeir hafa verið nálægt Liverpool og Manchester City en aldrei komist yfir línuna.“
