Trent Alexander-Arnold fór meiddur af velli í tapi liðsins gegn PSG í Meistaradeild Evrópu í gær. Meiðslin virkuðu alvarleg.
Trent gat varla labbað af velli eftir að hafa fest takkana í gervigrasi fyrir utan völlinn.
Hann virtist meiða sig á hné og gætu meiðslin orðið til þess að Trent spili ekki aftur fyrir Liverpool.
Samningur Trent við Liverpool rennur út í sumar og hefur hann verið sterklega orðaður við Real Madrid í sumar.
PSG byrjaði betur og komst yfir með marki Ousmane Dembele á 12. mínútu og jafnaði þar með einvígið. Þetta reyndist eina mark fyrri hálfleiks.
Liverpool kom af mun meiri krafti inn í seinni hálfleikinn en tókst ekki að nýta möguleika sína. Því var farið í framlengingu.
Þar var ekkert skorað, þó PSG hafi sótt nokkuð duglega að marki Liverpool undir lokin. Vítaspyrnukeppni þurfti til að skera úr um sigurvegara leiksins.
Þar klikkuðu bæði Darwin Nunez og Curtis Jones á sínum spyrnum fyrir Liverpool og Parísarliðið því áfram.
