Kristján Óli Sigurðsson gerði upp íþróttaárið með Helga Fannari Sigurðssyni í viðhafnarútgáfu af Íþróttavikunni á 433.is.

Ummæli Óskars Hrafns Þorvaldssonar, þjálfara KR, í viðtali við Fótbolta.net eftir 3-3 jafntefli við Breiðablik í sumar vöktu mikla athygli. Voru þau valin ummæli ársins í þættinum. Gefum Óskari orðið:

„Vegna þess að það er bara það sem við erum. Þar liggur sjálfsmynd okkar, að sækja. Ég hef vísað í Hernán Cortés þegar hann brenndi skip 1519 fyrir utan strendur Mexíkó. Menn höfðu ekkert val, þeir þurftu að fara upp á land og sigra asteka í mikilli undirtölu. Það gildir það sama um þetta. Ég talaði við konuna mína í síðustu viku og hún spurði þar sem við vorum að fara að mæta Íslandsmeisturunum á þeirra heimavelli hvort við ætluðum ekki að fara varkárt inn í leikinn? Ég leit aftur fyrir mig og spurði hana hvort hún sæi einhver skip. Hún sá engin skip. Þá var því svarað, við erum búnir að brenna skipin. Við munum ekki fara niður nema einhver þrýsti okkur niður af krafti eða gæðum sem gerðist í einhverjar þrjár eða fjórar mínútur undir lokin í dag.“

Ótrúleg ummæli og Óskar vel að nafnbótinni kominn. „Þetta var geggjað. Það er mun betra fyrir vöruna sem Besta deildin er að hafa þennan mann í henni. Hann glæðir hana lífi og skemmtilegum fótbolta,“ sagði Kristján.

Umræðan í heild er í spilaranum.