Bournemouth hyggst verða virkt á félagaskiptamarkaðnum fyrir janúargluggann í þeim tilgangi að styrkja lið Andoni Iraola.

Félagið frá suðurströndinni var með besta söluhagnaðinn í ensku úrvalsdeildinni í sumar, eftir að hafa selt lykilleikmenn til Real Madrid, PSG og Liverpool, samhliða því að ganga frá sjö nýjum leikmannakaupum. Þrátt fyrir ánægju innan félagsins með leikmannastefnuna vilja stjórnendur bæta frekar í hópinn.

Á óskalistanum fyrir janúar eru markvörður, kantmaður og miðvörður, ef réttu leikmennirnir verða lausir. Djordje Petrovic tók við hlutverki aðalmarkvarðar af Kepa Arrizabalaga, en Bournemouth vill fá markvörð sem getur veitt honum raunverulega samkeppni.

Félagið leitar einnig að hávöxnum og líkamlega sterkum miðverði og nýjum kantmanni. Á sama tíma er ljóst að mikill áhugi er á Antoine Semenyo, sem er með losunarákvæði upp á um 60 milljónir punda.

Bournemouth veit að erfitt verður að finna jafn öflugan arftaka, en hefur þó nokkra valkosti í sigtinu. Eftir sjö leiki án sigurs hefur liðið fallið úr 2. sæti niður í það 13. í deildinni.