Fyrrverandi ungstirni úr ensku úrvalsdeildinni lést í hræðilegu bílslysi á hraðbraut þegar hann var á leið heim eftir leik. Atvikið gerðist í gær.

Ethan McLeod, sem hafði leikið með akademíu Wolverhampton Wanderers áður en hann skrifaði undir hjá Macclesfield FC, lést þegar hvítur Mercedes-bíll hans lenti á vegriði. McLeod var aðeins 21 árs gamall og var úrskurðaður látinn á vettvangi slyssins á M1-hraðbrautinni nærri Northampton.

Macclesfield FC staðfesti andlátið í hjartnæmri tilkynningu í dag. Þar kom fram að Ethan hefði verið á heimleið eftir 2-1 sigur liðsins á Bedford Town þegar slysið varð.

„Með sorg í hjarta og óraunverulegri tilfinningu staðfestir Macclesfield FC fráfall 21 árs sóknarmannsins Ethan McLeod,“ sagði félagið.

„Hann var afar hæfileikaríkur og vel liðinn leikmaður sem átti allt lífið fram undan. Persónuleiki hans og jákvæðni snerti alla sem kynntust honum.“

McLeod var tíu ár í akademíu Wolves og lék einnig á láni hjá Alvechurch. Eftir brottför frá Molineux spilaði hann með Rushall Olympic og Stourbridge áður en hann gekk til liðs við Macclesfield í júlí á þessu ári.

Norðurakrein M1 var lokuð í yfir átta klukkustundir eftir slysið sem varð klukkan 22:40 á þriðjudagskvöld. Lögreglan í Northamptonshire leitar nú vitna að slysinu.