Pep Guardiola flutti ástríðufulla ræðu um átökin á Gaza í viðtali á spænsku útvarpi á mánudag og sagði að heimurinn hefði yfirgefið palestínsku þjóðina.

Stjóri Manchester City hefur áður tjáð sig opinskátt um alþjóðamál og lét ekki sitt eftir liggja þegar hann ræddi málið við RAC1. „Í hvert skipti sem ég ímynda mér hvað er að gerast hjá fólkinu í Palestínu, þá finn ég að heimurinn hefur skilið það eftir eitt,“ sagði hann.

„Börn, foreldrar og afar og ömmur sem fæddust þar bera ekki ábyrgð. Við höfum í mjög langan tíma leyft eyðingu heillar þjóðar. Ef við megum ekki kalla þetta þjóðarmorð, hvað er það þá?“

Guardiola sagði að sér fyndist óskiljanlegt að nokkur maður gæti varið þær hörmungar sem fjölmiðlar sýna daglega. Hann nefndi að vinir hans, bæði gyðingar og Ísraelar, hefðu sömu viðbrögð við myndunum.

Hann gagnrýndi jafnframt alþjóðlega leiðtoga og ákvarðanatöku þeirra: „Ég hef litla trú á leiðtogum í dag. Ef lausnin er ekki vopnahlé eða viðleitni til sátta, heldur aðeins vald og ofbeldi, þá er ljóst hvor aðilinn hefur yfirburðavopn.“

Guardiola ræddi málið í tengslum við góðgerðarlandsleik ACT x Palestine, þar sem Katalónía og Palestína mætast á Lluis Companys-leikvanginum í Barcelona í kvöld.