Jeremy Doku var afar gagnrýninn á belgíska landsliðið eftir 1-1 jafntefli gegn Kasakstan á laugardag, en heimamenn höfðu engu að keppa í undankeppni HM.

Belgía hefði með sigri tryggt sér farseðil á HM næsta sumar en þarf nú að ná úrslitum gegn Liechtenstein á þriðjudag til að festa sætið í hendur sér.

Leikurinn hófst á versta hugsanlega hátt fyrir Doku, Leandro Trossard og félaga, þegar Dastan Satpaev refsaði fyrir slæma vörn og kom Kasakstan í 1-0 snemma leiks. Hans Vanaken jafnaði síðar, en liðið undir stjórn Rudi Garcia náði ekki að kreista fram sigur, þrátt fyrir að Kasakstan spilaði manni færri.

Doku lét í sér heyra eftir leik og sagðist ekki sáttur við frammistöðuna. Hann benti á að Belgía hefði misst of mörg stig á keppninni vegna slæmrar spilamennsku og að skortur á lykilmönnum eins og Kevin De Bruyne, Romelu Lukaku og Thibaut Courtois væri engin afsökun.

„Við höfum þegar misst of mörg stig. Við höfum ekki verið nógu góðir. Allir þurfa að bæta sig. þjálfarinn, ég, allir,“ sagði hann.

„Ef við þurfum Kevin, Romelu og Thibaut til að vinna Kasakstan, þá eigum við ekki erindi á HM.“

Hann viðurkenndi jafnframt að Belgía hefði vanmetið andstæðinginn: „Við héldum að þeir myndu spila langar sendingar, en þeir fóru að spila fótbolta. Kannski greindum við þá ekki nógu vel.“