Alexander Isak segist ekki vilja afsaka slaka byrjun sína hjá Liverpool. Hann horfir þó jákvæðum augum á framhaldið.

Sóknarmaðurinn, sem kostaði félagið um 130 milljónir punda, hefur aðeins skorað eitt mark síðan hann knúði fram félagsskiptin frá Newcastle á lokadegi félagaskiptagluggans í sumar.

„Þetta hefur ekki verið frábært en ég er ekki að fara að nota neinar afsakanir,“ segir Isak, sem hefur einnig glímt töluvert við meiðsli.

„Það er erfitt að vera frá og ekki geta hjálpað. En nú er ég kominn aftur og jákvæður,“ segir Svíinn enn fremur.

Isak viðurkennir einnig að hann hafi verið töluvert langt frá því að vera í leikformi þegar hann kom frá Newcastle í sumar, enda var hann í stríði við félagið í allt sumar og að reyna að komast burt.