Cristiano Ronaldo gæti spilað í fyrsta leik Portúgals á Heimsmeistaramótinu næsta sumar, en portúgalska knattspyrnusambandið (FPF) hyggst samkvæmt fregnum áfrýja banni hans eftir rauða spjaldið í síðustu viku.

Ronaldo var rekinn af velli í 2-0 tapi gegn Írlandi í Dublin þegar klukkustund var liðin af leiknum, eftir að hafa slegið Dara O’Shea með olnboga í teignum. Óvissa ríkir um lengd bannsins, en hann var sjálfkrafa í banni í 9-1 stórsigri Portúgals á Armeníu á sunnudag, leik sem tryggði liðinu þátttöku á HM í Kanada, Bandaríkjunum og Mexíkó.

Venjan er sú að beint rautt spjald leiði til margra leikja banns og því gæti Ronaldo misst af fyrstu tveimur leikjum Portúgals á Heimsmeistaramótinu ef dómurinn stendur óhaggaður.

Samkvæmt A Bola vinnur FPF nú að því að leggja fram formlega kvörtun til FIFA, með það að markmiði að bannið nái eingöngu yfir leikinn gegn Armeníu. Blaðið segir að Pedro Proença, forseti FPF, hafi sjálfur komið að málinu og stýri varnarstarfinu fyrir hönd Ronaldo.

Portúgalar vonast til að milda refsinguna og tryggja að 40 ára fyrirliðinn verði með frá fyrsta leik þegar þeir hefja HM-ævintýrið næsta sumar.