Eiður Smári Guðjohnsen fyrrum fyrirliði íslenska landsliðsins segir það vera eins og að ganga í gegnum skilnað þegar leikmaður fer frá félagi eftir langan tíma.

Umræðan spratt upp í hlaðvarpinu Dr. Football þegar rætt var um mál Vals og Sigurðar Egils Lárussonar.

Sigurður er á förum frá Val, hann vildi vera áfram en fær ekki nýjan samning. Nokkur læti hafa verið í kringum þá ákvörðun Vals og hvernig að henni var staðið.

„Ég veit ekkert um þetta mál nema maður það sem maður les, ég held að félagið muni heiðra leikmann sem hefur verið í 13 ár hjá þeim. Hann á virðingu skilið,“ sagði Eiður í Dr. Football hlaðvarpinu.

Eiður segir þetta vera eins og að ganga í gegnum skilnað. „Þetta er ákveðinn skilnaður, leikmaður vill vera áfram. Hver sagði hvað og hvernig, hver er ástæðan? Þarftu að fá hana, útkoman er alltaf sú sama.“

Eiður rifjaði upp þegar hann fór frá Chelsea sumarið 2006, hann vissi þá að sinn tími þar væri á enda.

„Ég vissi það, þá var ég búin að eiga spjallið við Mourinho. Eins og maður les í þetta, þjálfari Vals virðist ekki vera inni í ákvörðunartöku fyrir næsta tímabil enda virðast þeir vera að taka nýjan þjálfara.“