Graham Potter var í gær látinn fara frá West Ham United eftir aðeins átta mánuði við stjórnvölinn hjá félaginu. Nuno Espirito Santo er tekinn við af honum.
Potter, sem var ráðinn í janúar síðastliðinn, náði ekki að snúa gengi liðsins við. West Ham átti í erfiðleikum undir hans stjórn á síðari hluta síðustu leiktíðar og hefur liðið byrjað tímabilið afar illa.
Síðasti leikur Potter í brúnni var 2-1 tap gegn Crystal Palace á heimavelli um síðustu helgi. Hann brást við brottrekstrinum með yfirlýsingu.
„Ég er gríðarlega svekktur yfir að þurfa að yfirgefa West Ham án þess að ná því sem við ætluðum okkur í upphafi. Ég viðurkenni þó að úrslitin hafa einfaldlega ekki verið nógu góð.
Ég vil þakka stjórninni fyrir að gefa mér tækifærið, starfsfólkinu fyrir að taka mér vel, leikmönnunum fyrir vinnusemina og síðast en ekki síst stuðningsmönnunum fyrir stuðninginn á erfiðum tímum. Ég óska félaginu alls hins besta í framtíðinni.“
