Breiðablik og KR gerðu dramatískt jafntefli í stórleik kvöldsins í Bestu deild karla.
Bæði lið fengu færi til að skora í fyrri hálfleik, en var þó markalaust þegar gengið var til búningsklefa. Í seinni hálfleik opnuðust hins vegar flóðgáttir.
Blikar byrjuðu hann af meiri krafti og kom Tobias Thomsen þeim yfir á 53. mínútu. Aðeins sjö mínútum síðar tvöfaldaði danski framherjinn forskotið með laglegri afgreiðslu.
Við þetta vöknuðu KR-ingar og Eiður Gauti Sæbjörnsson minnkaði muninn á 67. mínútu. Skömmu síðar jafnaði Jóhannes Kristinn Bjarnason leikinn og heldur ungi maðurinn áfram að eiga frábært tímabil.
Finnur Tómas Pálmason kom Vesturbæingum svo yfir á 81. mínútu og stefndi í að það yrði sigurmarkið, þar til Kristófer Ingi Kristinsson skoraði dramatískt jöfnunarmark í blálokin.
Lokatölur 3-3 og Blikar eru því með 10 stig í þriðja sæti, en KR-ingar eru sæti neðar með 3 stigum minna.
Víkingur hafði valdið nokkrum vonbrigðum í upphafi móts en liðið vann sigur á Fram í markaleik í dag.
Davíð Örn Atlason kom þeim yfir á 18. mínútu og tæpum tíu mínútum síðar tvöfaldaði Erlingur Agnarsson forskotið. Vuk Oskar Dimitrijevic minnkaði þó muninn fyrir gestina áður en hálfleiksflautið gall og allt opið fyrir seinni hálfleik.
Gylfi Þór Sigurðsson kom Víkingi hins vegar í 3-1 á 79. mínútu og skoraði þar með sitt fyrsta mark fyrir liðið. Róbert Hauksson minnkaði muninn fyrir Fram í uppbótartíma á ný en nær komust þeir ekki. Lokatölur 3-2.
Þar með er Víkingur kominn á toppinn með 10 stig, jafnmörg og Breiðablik og Vestri.
Stjarnan hefur engan veginn verið sannfærandi í upphafi móts og var þeim skellt af nýliðum Aftureldingar í kvöld.
Hrannar Snær Magnússon kom Mosfellingum yfir á 9. mínútu og reyndist það eina mark fyrri hálfleiks.
Georg Bjarnason bætti við marki á 57. mínútu og skömmu síðar innsiglaði Aron Jóhannsson 3-0 sigur.
Afturelding er komin með 7 stig og er í sjötta sæti, en Stjarnan er í því níunda með 6 stig.
