Trent Alexander-Arnold er engin goðsögn hjá Liverpool ef hann ákveður að yfirgefa félagið fyrir spænska stórliðið Real Madrid.

Þetta segir sparkspekingurinn og fyrrum leikmaðurinn Ally McCoist en Trent er mikið orðaður við Real í dag og verður samningslaus í sumar.

Trent er uppalinn hjá Liverpool og hefur spilað þar allan sinn feril en er sagður vilja komast til Spánar í sumar.

Trent kemst ekki á sama stall og aðrir leikmenn ef hann semur við Real í sumar að sögn McCoist en verður líklega þó áfram vinsæll á meðal stuðningsmanna liðsins.

,,Ef Trent Alexander-Arnold fer til Real Madrid þá þýðir það ekki endilega að hann sé ekki frábær þjónn í sögu félagsins en hann verður aldrei á sama stað og leikmenn eins og Steven Gerrard og Kenny Dalglish – goðsagnir,“ sagði McCoist.

,,Hann verður aldrei goðsögn eins og þeir, jafnvel þó að Gerrard hafi aldrei unnið deildina með félaginu.“