Knattspyrnudómarinn fyrrverandi, Pierluigi Collina, sem talinn er vera einn besti dómari sögunnar, segir að áreitni og ofbeldi í garð knattspyrnudómara sé vaxandi vandamál. Þetta kemur fram í viðtali hjá Sky News.

Collina segir að hatur í garð dómara sé „krabbamein sem gæti drepið fótboltann.“ – Vísar hann þar sérstaklega til hegðunar foreldra á leikjum barna sinna í yngri flokkum sem beini reiði sinni og vonbrigðum að dómurum með afar ósanngjörnum hætti.

Collina segir að starf dómarans hafi aldrei verið auðvelt. „Ég get því sagt að þetta er orðið verra en það var.“

„Ákvarðanatöku fylgir mikil ábyrgð. Hagsmunirnir sem eru í húfi eru gríðarlegir, ekki síst þegar spilað er á hæsta stig. Þetta er því erfitt.“

Collina segir að áreitni og hatursfull framkoma í garð dómara hafi eflaust færst í aukana með tilkomu og útbreiðslu samfélagsmiðla, nokkuð sem hann hafi verið laus við á hans ferli. Hann segist sjálfur ekki nota samfélagsmiðla sem geri líf hans betra.

Collina segir að það valdi dómurum miklum erfiðleikum að fótboltafélög og knattspyrnustjórar sái efasemdum um heilindi dómara og gefi í skyn að þeir séu hlutdrægir. Segir hann að frægir knattspyrnustjórar setji slæmt fordæmi í þessum efnum. „Því miður þá gerist þetta alltaf. Það er fólk sem er að leita að samsæri og finnur einhvern skít þar sem enginn er,“ segir Collina.

Sjá nánar á vef Sky News.