Miðlar á Spáni og Sádi-Arabíu halda því fram að Mohamed Salah sé þegar búinn að semja í síðarnefnda landinu.

Salah, sem er orðinn 32 ára gamall, er á sínu áttunda tímabili með Liverpool og einu því allra besta hingað til. Hann er kominn með 19 mörk og 18 stoðsendingar fyrir topplið úrvalsdeildarinnar í deildarkeppninni einni saman.

Samningur Salah er þó að renna út og verða stuðningsmenn Liverpool áhyggjufyllri með hverjum deginum sem líður. Salah mætti fara frítt næsta sumar og hefur einnig verið mikið orðaður við Paris Saint-Germain.

Miðað við þessi tíðindi fer hann þó í sádiarabísku deildina, en Egyptinn hefur lengi verið orðaður þangað.

Tveir lykilmenn í viðbót, Virgil van Dijk og Trent Alexander-Arnold, eru einnig að verða samningslausir. Það verður því nóg að gera hjá Liverpool næstu vikur og mánuði ef félagið vill halda þessum leikmönnum.