Framtíð Jadon Sancho, leikmanns Manchester United, er í algjörri óvissu. Hann á að snúa til æfinga í þessari viku.
Sancho var á láni hjá sínu gamla félagi, Dortmund, seinni hluta síðustu leiktíðar eftir stríð við Erik ten Hag, stjóra United. Það bendir ekkert til þess að samband þeirra hafi batnað eftir því sem fram kemur í enskum miðlum og Sancho því væntanlega á förum.
Sem fyrr segir á hann hins vegar að snúa aftur til æfinga í þessari viku en ekki einu sinni starfsfólk á æfingasvæði United veit hvað félagið ætlar sér að gera varðandi Sancho. Ekki er tekið fram hvort hann eigi að mæta til æfinga með öðrum leikmönnum aðalliðsins, hvenær hann á að fara í þolpróf og þess háttar. Engin dagskrá hefur verið sett upp fyrir kappann.
Sancho kostaði United 73 milljónir punda árið 2021 en hann kom einmitt frá Dortmund. Félagið vill losna við hann af launaskrá en hann þénar um 300 þúsund pund á viku. Dortmund vildi fá hann alfarið til sín aftur en hefur ekki efni á honum.
United vill fá um 45 milljónir punda fyrir kantmanninn og sem stendur hefur ekkert félag sýnt raunverulegan vilja til að klófesta hann.