„Þetta verður hörkuleikur. Við erum búnar að spila mikið við þær undanfarið svo við erum farnar að þekkja þær ágætlega og fara vel yfir þær. Þetta er rosalega sterkt lið og við þurfum að eiga toppdag til að fá eitthvað út úr leiknum,“ sagði Guðrún við 433.is í dag.
Leik liðanna ytra lauk með 3-1 sigri Þýskalands en Ísland átti fínasta leik. Stelpurnar okkar hafa lært vel af leikjunum við Þjóðverja undanfarið.
„Varnarlega þurfum við að loka á þær. Þær skora mikið af mörkum, eru með sterka leikmenn og vilja vera svolítið agressífar fram á við, koma með krossa og svona. Við verðum að vera sterkar í boxinu. Svo þurfum við að finna svæðin til að koma okkur framar. Leikurinn er spilaður á öllum vellinum og við þurfum að gera vel.“
Sem fyrr segir tryggir sigur á föstudag sætið á EM. Takist það ekki fær íslenska liðið annan séns á að tryggja sætið gegn Pólverjum ytra á þriðjudag.
„Við erum á heimavelli og erum að spila á móti Þýskalandi. Það væri ótrúlega sætt að gera það á móti þeim,“ sagði Guðrún.
Töluverð kynslóðaskipti hafa orðið á íslenska liðinu á undanförnum árum en nú virðist allt vera að smella saman.
„Við erum að komast meira inn í þetta allar saman. Það fór auðvitað gríðarleg reynsla úr liðinu á síðustu árum en það hafa komið mikil gæði sömuleiðis inn með ungu stelpunum. Ég er ótrúlega ánægð með hvernig þær eru að koma inn bæði innan og utan vallar.“
Nánar er rætt við Guðrúnu í spilaranum.