Það er möguleiki á að eiganda Nottingham Forest, Evangelos Marinakis, verði refsað harkalega af enska knattspyrnusambandinu eftir atvik sem átti sér stað í gær.

Um er að ræða moldríkan eiganda sem hefur sett mikla peninga í Forest sem tryggði sér nýlega sæti í efstu deild.

Marinakis var brjálaður eftir leik liðsins við Liverpool í gær en Forest tapaði 1-0 eftir sigurmark gestanna á 99. mínútu.

Eigandinn umdeildi var gríðarlega óánægður með dómgæsluna í leiknum og elti dómara leiksins, Paul Tierney, inn í leikmannagöngin.

Þar þurfti öryggisgæsla að fjarlægja þennan ágæta mann af vettvangi og fékk hann því tíma til að róa sig niður.

,,Þú sérð þetta sjaldan. Marinakis þurfti að vera fjarlægður af öryggisvörðum,“ sagði blaðamaðurinn Rob Schofield sem var staddur á vellinum.

,,Marinakis elti Tierney og Graham Scott inn á þeirra eigin skrifstofu. Hann öskraði: ‘Virðið leikmennina, virðið leikmennina, þetta gerist í hverri viku!’

Forest hefur tjáð sig um málið og segir að Marinakis hafi rætt stuttlega við dómarana og að það hafi verið engin þörf á öryggisgæslu.