Barcelona mistókst einfaldlega að sannfæra vængmanninn Nico Williams um að ganga í raðir félagsins í sumar.

Frá þessu greinir Sport en ástæðan er heldur betur skrítin en Williams er á mála hjá Athletic Bilbao í La Liga.

Sport segir að Barcelona hafi ekki getað lofað því að ná að skrá Williams til leiks áður en tímabilið hófst sem hafði mikil áhrif á félagaskiptin.

Spænski landsliðsmaðurinn hefði kostað dágóða upphæð í glugganum og er Barcelona í gríðarlega miklum fjárhagsvandræðum.

Williams hefði því mögulega misst af fyrstu leikjum deildarinnar líkt og Dani Olmo, leikmaður liðsins, sem kom frá RB Leipzig í sumar.

Williams ákvað að halda sig hjá uppeldisfélaginu en Barcelona gæti reynt við hann í annað sinn á næsta ári.