Fyrrum knattspyrnustjarnan Anthony Stokes er heldur betur í veseni en hann mætti fyrir framan dómara á dögunum.

Stokes var fundinn sekur um nokkur brot en hann var drukkinn undir stýri og bar með sér mikið magn af fíkniefnum.

Stokes reyndi að fela kókaín frá lögreglunni með því að setja það í eigin sokk en hann var stöðvaður keyrandi á 160 kílómetra hraða.

Mikið magn af kókaíni fannst í bifreið Stokes eða sem kostaði þennan fyrrum leikmann tæplega 600 þúsund krónur.

Írinn var handtekinn á síðasta ári en réttarhöld áttu sér stað í vikunni þar sem Stokes viðurkenndi að hafa keyrt undir áhrifum áfengis og tók þá fulla ábyrgð á eiturlyfjunum sem fundust.

Stokes lagði skóna á hilluna árið 2020 þá 32 ára gamall en hann lék níu landsleiki fyrir Írland á sínum ferli.

Hann lék fyrir þónokkur ensk lið en nefna má Arsenal, Sunderland, Sheffield United, Crystal Palace og Blackburn.

Stokes er þekktastur fyrir tíma sinn hjá Celtic þar sem hann lék í sex ár og skoraði 76 mörk í 191 leik fyrir skoska stórliðið.

Refsing Stokes verður ákveðin þann 1. október næstkomandi en líkur eru á að hann þurfi að sitja inni í einhvern tíma.