Aron Pálmarsson, einn fremsti handboltamaður Íslandssögunnar, var gestur þeirra Helga Fannars Sigurðssonar og Hrafnkels Freys Ágústssonar í Íþróttavikunni á 433.is. Þar var farið um víðan völl.
Undanfarið hefur það verið áberandi í fréttum að knattspyrnumenn kvarti undan auknu leikjaálagi. Má nefna Rodri, leikmann Manchester City, og Alisson hjá Liverpool í því samhengi.
„Það er svolítið erfitt fyrir mig að hlusta á þetta væl í þeim. Ég hef verið í miklu álagi þar sem þú æfir ekki neitt milli leikja, þú ert í taktík, sjúkraþjálfun, líkamsræktarsalnum. Og við fáum ekki krónu aukalega, fyrir landsliðin og þetta og hitt. Á meðan hafa þessir gæjar það ágætt bara á að mæta í landsliðið,“ sagði Aron.
„Ef þeir eru að fá lítinn bita af kökunni skil ég þá kannski, að þeir vilji stækka hann. Baráttan í handboltanum er reyndar meira um að fá einhvern bita af kökunni.“
Aron segir að ekki megi gleyma að leikmennirnir sjálfir séu ómissandi en að þeir verði einnig að átta sig á þeim forréttindum sem þeir búa við, að fá að spila íþróttina sem þeir elska.
„Íþróttin er ekkert án leikmannanna. Við erum að leggja allt á okkur. Það er flott fólk að vinna í kringum þetta og allt það en þegar þú ert farinn að sjá minni bita af kökunni þá auðvitað skil ég að menn láti í sér heyra.
Það sem þetta gefur þér sem íþróttamanni er svo einstakt, að fá að labba inn á Anfield og þessa velli. Ég er að fá gæsahúð bara við að tala um þetta. Þetta er ómetanlegt, burt séð frá öllum peningum, frægð og kjaftæði. Pældu í því hvað þú ert heppinn að komast í þetta, það eru svo fáir sem fá að gera þetta.“
Umræðan í heild er í spilaranum.
Íþróttavikan er í boði Bola léttöl og Lengjunnar
