Gylfi Þór Sigurðsson hefur mikið verið í umræðunni undanfarnið og hafa kjaftasögur verið á kreiki um meint ósætti hans hjá Val.

Því var til að mynda haldið fram í Þungavigtinni að Gylfi hafi viljað yfirgefa Val fyrir gluggalok á dögunum og reynt að fá samningi sínum rift. Þar kom einnig fram að hann hafi þá viljað fara í Íslandsmeistaralið Víkings.

Arnar Gunnlaugsson, þjálfari Víkings, ræddi við 433.is í dag í tilefni að Evrópuleik liðsins gegn Santa Coloma á morgun og var hann meðal annars spurður út í það hvort Víkingur hafi reynt að fá Gylfa.

„Nei, það var bara orðrómur. Við reyndum aldrei að hafa samband við hann eða neitt því líkt,“ sagði Arnar þá.

Börkur Edvardsson, formaður knattspyrnudeildar Vals, ræddi við 433.is í gær og var hann þar spurður út í meint ósætti Gylfa á Hlíðarenda og orðróma um að hann hafi viljað fara. Börkur sló á þá.

„En hann, eins og við öll sem erum í kringum félagið, er ósáttur með gengi liðsins. Það er undir okkur í stjórn, hjá þjálfarateymi og leikmönnum að snúa þessu gengi við,“ sagði Börkur meðal annars.

Meira
Börkur segir ekki rétt að Gylfi hafi viljað fara – „Eins og við er hann ósáttur með gengi liðsins“