Gareth Southgate, landsliðsþjálfari Englands, er alveg sama hvað stuðningsmenn Englands hafa að segja um hans störf með landsliðið.
Southgate hefur fengið töluverða gagnrýni á EM í Þýskalandi en England hefur ekki verið sannfærandi í sínum leikjum hingað til.
Stuðningsmennirnir ættu þó að einbeita sér að öðrum hlutum að sögn Southgate en England spilar við Slóvakíu í dag í 16-liða úrslitum.
,,Það skiptir engu máli hvaða skoðun þeir hafa á mér,“ sagði Southgate á blaðamannafundi.
,,Það mikilvægasta er að styðja við bakið á liðinu og það sem ég sagði fyrr í vikunni var til þess að fá réttan stuðning líkt og í seinni hálfleik í síðasta leik.“
,,Þú ert örugglega fimm prósentum frá því að vera þar sem þú vilt vera. Þú þarft að passa þig að kasta ekki öllu út um gluggann.“
