Elimar Hauksson, verjandi knattspyrnumannsins Kolbeins Sigþórssonar, sem fyrr í dag var sýknaður í Héraðsdómi Reykjaness af ákæru um kynferðisbrot gegn barni, segir að niðurstaðan hafi ekki komið sér á óvart.

DV spurði Elimar hvort hann ætti von á því að ákæruvaldið áfrýjaði málinu til Landsréttar:

„Í ljósi þess hvað niðurstaða dómsins var afdráttarlaus þá á ég síður von á áfrýjun. En það er auðvitað ákvörðun sem er í höndum embættis ríkissaksóknara, en miðað við fyrirliggjandi gögn og miðað við dóminn þá tel ég það ólíklegt,“ segir Elimar.

Elimar segir gögn málsins hafa kallað á sýknu. „Ég get ekki tjáð mig um málavexti þar sem um lokað þinghald er að ræða en eftir að dómurinn hefur verið birtur geta fjölmiðlar fjallað ítarlega um þá og það er jákvætt,“ segir hann ennfremur og segir skjólstæðing sinn vera varnarlausan gegn umfjöllun um mál sitt í fjölmiðlum og samfélagsmiðlum þar sem hann getur ekki borið hönd yfir höfuð sér, því ólöglegt er að tjá sig um lokað þinghald.

Saksóknari í málinu, Katrín Hilmarsdóttir, sagðist ekki geta tjáð sig um málið er DV leitaði eftir viðbrögðum, þar sem hún hefði ekki kynnt sér forsendur dómsins.

Þess má geta að dómurinn verður birtur á vefsíðu dómstólanna í dag.