„Það vilja allir vera ofar. Það er alveg ljóst,“ sagði Ólafur Kristjánsson, þjálfari Þróttar, við 433.is á kynningarfundi Bestu deildar kvenna í dag. Þar var spá fyrirliða, þjálfara og formanna opinberuð og Þrótturum spáð sjötta sæti.
Ólafur tók við Þrótti í vetur en liðið hefur ekki sett sér markmið er varðar sæti í deildinni heldur frekar frammistöðu á vellinum.
„Við erum nýr hópur, nýr þjálfari og það tekur tíma að púsla þessu saman. Leikstíllinn verður kannski aðeins annar. En það er alveg ljóst að við förum í alla leiki til að reyna að vinna þá. Við erum ekki með markmið um nein sæti eða svoleiðis heldur ná tökum á því sem við erum að gera, þessum leikstíl og bæta okkur.“
Hann var spurður út í þennan nýja leikstíl.
„Við viljum spila fram á við þó við verðum að bera virðingu fyrir varnarleiknum. En við viljum vera með smá ákefð í leiknum, spila í gegnum miðjuna. Við viljum halda boltanum þegar það á við og fara beinskeytt þegar það á við.“
Ólafur er himinnlifandi með fyrstu mánuðina í starfi í Laugardalnum.
„Þetta er búið að vera meiriháttar, ótrúlega skemmtilegt. Þróttur er mjög skemmtilegt félag. Það er mikil nánd, margir sem koma að félaginu og vinna þétt saman. Stelpurnar eru búnar að vera frábærar. Hópurinn er lítill en þéttur. Hann er búinn að vera saman í einhvern tíma og þær sem hafa komið inn hafa fallið vel inn í hópinn. Það er tilhlökkun að mæta í vinnuna á hverjum einasta degi. Maður biður ekki um meira.“
