Jóhann Ingi Jónsson dómari gerði slæm mistök í leik Fram og Víkings á sunnudag sem reyndust dýrkeypt fyrir fyrrnenfnda liðið. Þetta var til umræðu í hlaðvarpi Íþróttavikunnar þar sem farið var yfir leikina í Bestu deild karla.
Víkingur vann leikinn 0-1 en Framarar töldu sig hafa komist yfir á elleftu mínútu leiksins þegar Alex Freyr Elísson setti knöttinn í netið. Jóhann dæmdi markið hins vegar af vegna hendi. Í endursýningum sést að það var röng ákvörðun.
„Akkúrat út af þessu þurfum við einhvers konar útgáfu af VAR til Íslands. Þó það gæti ekki endilega teiknað rangstöðulínur eða þess háttar, en bara til að koma í veg fyrir allra mesta bullið,“ sagði Helgi Fannar Sigurðsson í þættinum.
Hörður Snævar Jónsson tók til máls.
„Það hlýtur að líða að því. Ég er samt hræddur við var í svona „single-cam“ leikjum. En vonandi er hægt að finna einhverja tækni fyrir okkur sem eiga ekki efni á þessu dýrasta, eins og í Meistaradeildinni eða ensku úrvalsdeildinni.“