KR hefur farið frábærlega af stað í Bestu deild karla og unnið báða leiki sína undir stjórn Gregg Ryder. Liðið var til umræðu í hlaðvarpi Íþróttavikunnar, þar sem farið var yfir leikina í Bestu deild karla.

„Það er heldur betur stemning í kringum þetta lið. Bjórkvöldin sem Gregg Ryder hefur boðað fyrir stuðningsmenn hafa þjappað hópnum saman. Hann er virkur í því að virkja stuðningsmennina og veit kannski að það gerist ekkert hjá KR nema stúkan og stuðningsmenn séu með. Það hefur verið lágdeyða yfir þessu undanfarin tvö ár eða svo en það var mikil stemning á föstudaginn og í fyrstu umferðinni líka. Það er eitthvað að gerjast þarna,“ sagði Hörður Snævar Jónsson í þættinum.

„Þetta er „feel good-factorinn“ sem KR þurfti í byrjun móts, sérstaklega í ljósi þess að Gregg var ekki fyrsti maður á blaði í þetta þjáfarastarf. Hann er gjörsamlega búinn að ná stuðningsmönnum á sitt band,“ sagði Helgi Fannar Sigurðsson.

Hörður velti því upp hvort þetta KR-lið gæti hreinlega barist um titilinn.

„Þegar maður horfir á þetta lið á pappír, ef allir hitta á tímabilið sitt, er hægt að útiloka að þetta lið geti allavega gert atlögu að þessu lengi vel?“ spurði hann og Helgi tók til máls á ný.

„Það er ekkert útilokað. Eina ástæðan fyrir að manni finnst það ólíklegt eru bara gæði toppanna, þá aðallega Víkings. Þú þarft að eiga svo rosalega gott tímabil, myndi maður halda, til að vera þarna í toppnum. En leikmann fyrir leikmann er þetta eitt allra besta liðið og þeir virðast allir koma fljúgandi inn í þetta mót. Ég efast ekki um að þeir trúi því allir.“