Eden Hazard ætlar að passa sig á því að fitna ekki of mikið nú þegar ferlinu er lokið en Hazard átti oft í vandræðum á ferlinum með að halda sér í formi.

Hazard hefur sagt frá því að hann hafi alltaf bætt á sig á sumrin þegar það var frí en nú er hann að reyna að passa sig.

Hazard hefur boðað komu sína í góðgerðarleik á Englandi og ræddi málin.

„Ég vil ekki enda eins og Gurra grís,“ segir Hazard og á þar við Peppu Pig sem er vinsæl sjónvarpsfígúra fyrir krakka.

„Ég spila tennis, padel og hleyp. Ég fer svo í fótbolta með vinum mínum.“

Hazard ákvað að hætta þegar samningur hans við Real Madrid rann út síðasta sumar en hann er 33 ára gamall.

„Ég nýt þess að vera hættur en ég sakna fótboltans, ég sakna þess að vera í klefanum. Ég er með börn og fjölskyldu, við getum oftar farið heim til Belgíu og hitt bræður mína og fjölskyldu. Ég get gert meira.“