Dagana 14. og 15. febrúar sóttu átta íslenskir knattspyrnudómarar námskeið í VAR-dómgæslu í Stockley Park í London þar sem VAR-miðstöð ensku Úrvalsdeildarinnar er staðsett.

Námskeiðið er hið fyrra tveggja sem íslenskir dómarar þurfa að sækja til að öðlast réttindi til að dæma VAR leiki á alþjóðlegum vettvangi

Námskeiðið sóttu FIFA dómararnir Helgi Mikael Jónasson og Ívar Orri Kristjánsson, Jóhann Ingi Jónsson, dómari í Bestu deild, og FIFA aðstoðardómararnir Andri Vigfússon, Eysteinn Hrafnkelsson, Kristján Már Ólason, Ragnar Bender, og Egill Guðvarður Guðlaugsson.

Fyrir eru þeir Vilhjálmur Alvar Þórarinsson, Birkir Sigurðarson og Gylfi Már Sigurðsson með réttindi til að dæma VAR leiki á alþjóðlegum vettvangi.

Námskeiðið var haldið af PGMOL sem er fyrirtæki sem heldur utan um dómgæslu í efstu deildum karla og kvenna í Englandi, en námskeiðið sóttu einnig dómarar frá N-Írlandi, Írlandi, Wales og Svíþjóð.