21 af 28 íþróttafréttamönnum sem eru í samtökum íþróttafréttamanna völdu Gísla Þorgeir Kristjánsson, handboltakappa hjá Magedeburg sem íþróttamann ársins. Vinnur Gísli kjörið með miklum yfirburðum.
Fjórir aðilar fengu atkvæði í efsta sæti en ekki er gefið upp hvaða aðrir aðilar voru þar um að ræða.
Gísli Þorgeir fór á kostum með Magdeburg í úrslitahelgi Meistaradeildar Evrópu í byrjun sumars. Gísli var allt í öllu gegn Barcelona í undanúrslitum keppninnar þegar liðið komst í úrslit. Gísli meiddist þó illa í leiknum en tókst að spila úrslitaleikinn gegn Kielce í gegnum meiðslin. Gísli var afar mikilvægur í úrslitunum þar sem Magdeburg tryggði sér Evrópumeistaratitilinn. Eftir leik var hann valinn verðmætasti leikmaður úrslitahelgarinnar. Gísli Þorgeir var einnig valinn besti leikmaður þýsku deildarinnar í vor. Þá var Gísli lykilmaður í íslenska landsliðinu á HM. Gísli endaði meðal annars í fimmta sæti yfir flestar stoðsendingar á mótinu.
Antonn Sveinn McKee, sundkappi endar í öðru sæti í kjörinu. Anton vann til silfurverðlauna í 200 metra bringusundi á Evrópumótinu í 25 metra laug í Rúmeníu í desember, sem eru fyrstu verðlaun Íslendings á stórmóti í sundi í sjö ár. Þá varð Anton fyrsti Íslendingurinn til að ná Ólympíulágmarki inn á leikana í París næsta sumar þegar hann sótti sér keppnisrétt í 200 metra metra bringusundi á leikunum. Anton náði lágmarkinu í undanúrslitum heimsmeistaramótsins í Japan í ár. Anton komst í úrslit á HM og endaði í sjöunda sæti.
Glódís Perla Viggósdóttir, leikmaður FC Bayern og fyrirliði kvennalandsliðsins í knattspyrnu endar í þriðja sæti. Glódís spilaði stórt hlutverk í hjarta varnarinnar hjá Bayern München sem varð þýskur meistari á árinu. Glódís var valin í lið ársins í Þýskalandi og vefmiðillinn Goal setti hana í tíunda sæti yfir bestu knattspyrnukonur Evrópu á síðustu leiktíð. Fyrir yfirstandandi leiktíð var Glódís gerð að fyrirliða Bayern, en hún er einni fyrirliði íslenska landsliðsins og fór fyrir því með því að skora sigurmarkið gegn Wales á Laugardalsvelli í Þjóðadeild Evrópu í haust.
Sveindís Jane Jónsdóttir er í fimmta sæti listans og Jóhann Berg Guðmundsson leikmaður Burnley í ensku úrvalsdeildinni er í því sjöunda.
Albert Guðmundsson sem hefur spilað frábærlega með Genoa í úrvalsdeildinni á Ítalíu nær aðeins í 13 sæti listans þrátt fyrir mjög gott ár með félagsliði sínu.
Hákon Rafn Valdimarsson og Hákon Arnar Haraldsson fengu nokkur atkvæði í kjörinu.
Þetta er í fyrsta sinn sem Gísli Þorgeir fær verðlaunin en 28 íþróttafréttamenn standa að kjörinu og fengu 23 íþróttamenn atkvæði í kjörinu. Allir sem fengu atkvæði voru í hið minnsta á tveimur listum.
Íþróttamaður ársins:
1. Gísli Þorgeir Kristjánsson, handbolti 500
2. Anton Sveinn McKee, sund 372
3. Glódís Perla Viggósdóttir, fótbolti 326
4. Andrea Kolbeinsdóttir, frjálsíþróttir 101
5 .Sveindís Jane Jónsdóttir, fótbolti 94
6. Elvar Már Friðriksson, körfubolti 93
7. Jóhann Berg Guðmundsson, fótbolti 73
8. Sóley Margrét Jónsdóttir, kraftlyftingar 69
9. Thelma Aðalsteinsdóttir, fimleikar 53
10. Snæfríður Sól Jórunnardóttir, sund 47
11. Baldvin Þór Magnússon, frjálsíþróttir 37
12. Jóhanna Margrét Snorradóttir, hestaíþr. 35
13. Albert Guðmundsson, fótbolti 31
14. Kristín Þórhallsdóttir, kraftlyftingar 30
15. Snorri Einarsson, skíðaganga 28
16. Eygló Fanndal Sturludóttir, lyftingar 27
17. Bjarki Már Elísson, handbolti 26
18. Viktor Gísli Hallgrímsson, handbolti 24
19. Hákon Rafn Valdimarsson, fótbolti 22
20. Hákon Arnar Haraldsson, fótbolti 20
21. Haraldur Franklín Magnús, golf 19
22. Ragnhildur Kristinsdóttir, golf 10
23. Sandra Erlingsdóttir, handbolti 7
