Önnur félög eru strax farin að gjóa augunum til Aaron Ramsdale í kjölfar þess að hann var bekkjaður um helgina. Daily Mail fjallar um málið.

Ramsdale þurfti að setjast á bekkinn í sigri á Everton í ensku úrvalsdeildinni um helgina og kom nýr markmaður félagsins, David Raya, inn í markið.

Ekki er ljóst hvað þetta þýðir fyrir Ramsdale sem hefur eignað sér stöðu aðalmarkvarðar hjá Arsenal undanfarin tímabil.

Mikel Arteta, stjóri Arsenal, heldur því fram að hann ætli sér að nota báða markmenn á tímabilinu en það breytir því ekki að önnur félög fylgjast nú með gangi mála hjá Ramsdale.

Chelsea hefur áhuga en fyrir er liðið með þá Robert Sánchez og Djordje Petrovic sem komu í sumar.

Þá leitar Bayern Munchen að arftaka Manuel Neuer og er Ramsdale sagður á blaði þar.

Arsenal mætir PSV í Meistaradeild Evrópu á morgun og verður afar áhugavert að sjá hver stendur í rammanum í þeim leik.