Mauricio Pochettino, stjóri Chelsea, svaraði fyrir sig fullum hálsi á blaðamannafundi eftir leik við Bournemouth í gær.

Chelsea gerði markalaust jafntefli við Bournemouth og er ekki sannfærandi fyrir framan markið þessa dagana.

Baulað var á leikmenn liðsins er þeir gengu af velli eftir lokaflautið og veit Pochettino að staðan er erfið.

Margir leikmenn Chelsea eru að glíma við meiðsli en Pochettino segist ekki ætla að fara að gráta yfir því og horfir fram veginn.

,,Ef allir leikmennirnir væru heilir þá gætum við auðvitað barist um alla titlana en af hverju er þetta öðruvísi fyrir okkur?“ sagði Pochettino.

,,Við höfum verið mjög óheppnir, 12 leikmenn eru meiddir. Við erum með þrjá eða fjóra unglinga á bekknum, ætla ég að fara að gráta? Nei, ég sætti mig við þetta og held áfram. Bournemouth er gott lið.“