Piers Morgan er ekki þekktur fyrir að sitja á skoðunum sínum og gerði hann það ekki heldur fyrir leik Arsenal og Everton í gær.

Fjölmiðlamaðurinn umdeildi er mikill stuðningsmaður Arsenal en hans menn unnu 0-1 sigur á Everton í ensku úrvalsdeildinni í gær.

Það vakti athygli fyrir leik að David Raya var í marki Arsenal í sínum fyrsta leik eftir að hann kom frá Brentford í sumar.

Aaron Ramsdale, sem hefur eignað sér stöðu aðalmarkvarðar Arsenal undanfarin tímabil, settist á bekkinn.

„Ég skil ekki hvað Ramsdale gerði af sér til að vera bekkjaður. Hann hefur verið frábær fyrir okkur leik eftir leik. Af hverju að niðurlægja hann?“ spurði Morgan harðorður á Twitter (X).

Þetta kom ekki að sök því sem fyrr segir vann Arsenal leikinn 0-1.

Það verður áhugavert að sjá hver verður á milli stanganna í leik liðsins gegn PSV í Meistaradeild Evrópu á miðvikudag.