Kári Árnason, yfirmaður knattspyrnumála hjá Víkingi Reykjavík segir kæruleysi hafa sett stórt strik í reikninginn hjá karlalið félagsins sem kom inn í síðasta Íslandsmót sem Íslands- og bikarmeistari en tókst „bara“ að verja bikarmeistaratitil sinn.
Kári og Arnar Gunnlaugsson, þjálfari Víkinga voru gestir í Víkings Podcastinu þar sem umsjónarmaður þáttarins, Tómas Þór Þórðarson fór yfir sviðið með þeim.
Víkingar enduðu í 3. sæti Bestu deildarinnar á síðasta tímabili eftir að hafa unnið efstu deildina árið áður. Liðið hélt þó áfram einokun sinni á bikarmeistaratitlinum og átti virkilega góðan sprett í Evrópu.
„Hefðirðu sagt við mig fyrir tímabilið að niðurstaðan yrði 3. sæti í deild og bikarmeistaratitillinn, þá hefði ég ekki verið sáttur með það,“ sagði Arnar Gunnlaugsson, þjálfari Víkinga í nýjasta þætti Víkings Podcastsins. „Hefðirðu bætt við frábærum árangri í Evrópukeppni, þá hefði ég mögulega gúdderað það.
Ef ég hefði hins vegar vitað fyrir fram, fyrir síðasta sumar, um öll þessi meiðsli sem við lentum. Þá er 3. sæti, bikarmeistaratitillinn og frábær árangur í Evrópukeppni bara mjög gott. Eitthvað sem Víkingar ættu að vera stoltir af.“
Tómas Þór spurði þá Kára og Arnar hvort það væri eitthvað í tölunum sem væri hægt að benda á í ljósi þess hvað hafi farið úrskeiðis hjá Víkingum?
„Við ætlum ekki að fara henda einhverjum undir rútuna hérna,“ svaraði Kári þá. „Við vitum nákvæmlega hvað fór úrskeiðis og hverjir voru ekki nægilega góðir. Það var náttúrulega bara ákveðið kæruleysi sem kom upp í leikjum sem við áttum að vinna allan daginn. Við fáum til að mynda eitt stig í þremur leikjum gegn Stjörnunni. Þeir eru með gríðarlega óreynt lið, spennandi lið á því tímabili, en hafa styrkt sig mjög mikið núna.
Þetta eru náttúrulega leikir sem við ætluðumst til að vinna. Eins leikir á móti Leikni á útivelli og ÍA, lið sem falla á endanum. Við töpuðum 3-0 á móti Skaganum. Þetta var bara kæruleysi og í raun það sem á endanum fór með deildina hjá okkur þegar á öllu er á botninn hvolft, frekar en að ná í fleiri stig á móti Breiðabliki.“
Arnar bætti þá við og sagði slæma byrjun liðsins á síðasta tímabili á endanum hafa haft mikið að segja. Þegar að hann horfir til baka segir hann mjög áhugaverða hluti hafa átt sér stað í upphafi móts í apríl.
„Þegar að við mætum Breiðabliki í leik um titilinn Meistarar meistaranna, viku áður en Íslandsmótið hefst, þá vorum við, með fullri virðingu fyrir þeim, með mikla yfirburði í þeim leik. Það virkuðum langt á undan þeim í flestum þáttum fótboltans.
Viku seinna erum við mættir í strögglið á móti FH, leik sem við vinnum þó 2-1 á ósannfærandi hátt, og Blikarnir fara á smá flug á móti Keflavík í leik sem þeir vinna 4-1 og Ísak Snær skorar tvö mörk í.“
Arnar segir fyndið að sjá hversu mikill viðsnúningur getur orðið á einni viku.
„Það er ekkert sem tengist einhverjum háþróuðum æfingaáætlunum, það bara gerist eitthvað. Mögulega gerðist það hjá okkur að Pablo Punyed meiðist í leiknum um meistara meistaranna og er frá einhverja 4-5 leiki í röð. Sem er allt í lagi í venjulegu árferði, að missa sterkan póst.
En ef þú bætir því ofan á að missa Kára og Sölva Geirs, Halldór Smári er meiddur líka, við seljum Atla Barkar og alls konar svona rugl, þá ertu komið með of mikið af hræringum.“
Spjall Tómasar Þórs við Arnar og Kára má hlusta á í heild sinni hér fyrir neðan:
