Jurgen Klopp var allt annað en sáttur við fjölmiðlamanninn Marcus Buckland er hann mætti í viðtal á Amazon eftir sigur Liverpool á Sheffield United í gær. Fjölmiðlamaðurinn umdeildi Piers Morgan gagnrýnir Þjóðverjann harðlega fyrir viðbrögð sín.
Liverpool vann 0-2 með mörkum frá Virgil van Dijk og Dominik Szoboszlai.
Næsti leikur Liverpool er gegn Crystal Palace í hádeginu á laugardag en Klopp hefur áður gagnrýnt þann leiktíma. Buckland ákvað að grínast með það í beinni útsendingu í gær og sagði í gríni að það væri uppáhalds leiktími þýska stjórans.
„Það er frábært að þú skulir grínast með þetta,“ svaraði ósáttur Klopp í kaldhæðnistón.
Buckland sagði að hann hafi ekki ætlað sér að sýna vanvirðingu.
„Þú ert samt búinn að því,“ svaraði Klopp þá beittur og hélt áfram.
„Þú ert mjög hugrakkur að grínast með þetta. Vði förum að sofa 1 eða 2 í nótt, æfum tvisvar og spilum svo aftur. Þú skilur þetta ekki en starfar í fótboltaheiminum svo af hverju ætti ég að útskýra þetta aftur.“
Morgan hafði ekki gaman að þessum svörum Klopp.
„Klopp er með mjög slakan húmor þarna,“ segir hann.
„Eins og Pep virðist hann átta sig á veldinu sem Arsenal er að verða í deildinni,“ bætir hann við en Morgan er mikill stuðningsmaður Arsenal.
