Knattspyrnumaðurinn Kristinn Aron Hjartarson, Kiddi Hjartar, segir nauðsynlegt að aftengja íþróttir og veðmál. Veðmálafíkn sé ein versta fíknin til að glíma við og talar Kiddi þar af reynslu.

Ríkir íþróttamenn að leika sér með peninga

Þetta kom fram í hlaðvarpinu Mín skoðun með Valtý Birni. Þar barst talið að ítalska veðmálahneykslinu sem hefur valdið titringi innan knattspyrnuhreyfingarinnar þar í landi. Þar leiddi rannsókn í ljós að knattspyrnumenn höfðu verið að leggja stund á veðmál í tengslum við knattspyrnuleiki, nokkuð sem þeim er harðbannað að gera jafnvel þó þeir séu ekki sjálfir að keppa. Þar að auki reyndust þeir hafa notast við ólöglegar veðmálasíður.

Fram kom í hlaðvarpinu Mín skoðun að þetta sé alvarlegt mál, en það sé eins alvarlegt að veðmál tíðkist yfir höfuð í knattspyrnu og íþróttum almennt.

Svanhvít Valtýsdóttir, sem eins var meðal gesta í þættinum, sagði veðmálafíkn mikið vandamál í íþróttaheiminum.

„Þetta eru einstaklingar sem eiga allt, allt, alltof mikið af peningum og eru í rauninni að leika sér með peningana sína.·

Þeir leikmenn sem stundi veðmál séu eins slæmar fyrirmyndir og það geti orðið.

Líkaminn gekk eins og klukka

Kiddi Hjartar sagði fíkn sem þessa eitt versta fíkniefnið sem hægt er að ánetjast.

„Þetta heltekur þig. Veðmálafíkn. Ég fór í meðferð út af þessu. Það er viðbjóður að festast í þessu. Líkaminn minn gekk eins og klukka,“ sagði Kiddi og bætti við að hann þurfti að vaka þar til allir leikir voru búnir í Suður-Ameríku og þurfti svo að vakna skömmu síðar til að fylgjast með leikjum í Asíu.

„Veðmál eru viðbjóður“

Fylgifiskar fíknarinnar voru meðal annars þeir að Kiddi leitaði í áfengi til að ná að dreifa huganum frá veðmálum, sem hann líkir við krabbamein.

Hann hafi byrjað að fikta við veðmál en eftir að hann vann í fyrsta sinn háa fjárhæð þá var hann háður og ekki varð eftur snúið. Hann segir þetta raunveruleika margra, það sé þessi fyrsti stóri vinningur sem fólk ánetjast og sé sífellt að reyna að endurskapa.

Verst hafi verið þegar hann var líka að veðja á körfuboltann í NBA-deildinni, því þá hafði hann hreinlega engan tíma til að sofa.

Það þurfi því að koma veðmálum út úr íþróttunum.