Gísli Eyjólfsson, leikmaður Breiðabliks, var að vonum himinnlifandi með sigur á Struga frá Norður-Makedóníu í Sambandsdeildinni í kvöld. Með sigrinum varð Breiðablik fyrsta íslenska karlaliðið til að fara í riðlakeppni í Evrópu.
Blikar leiddu 1-0 fyrir leikinn í kvöld eftir sigur ytra og niðurstaðan varð sú sama í dag. Samanlagt 2-0.
Gísli segir að vegferðin í riðlakeppni Evrópu hafi hafist árið 2020.
„Þetta byrjaði í Noregi á móti Rosenborg þegar það var hlegið af manni fyrir að spila okkar bolta. En það er svo sannarlega búið að skila sér núna, allt sem Óskar er búinn að setja fyrir í Breiðablik,“ segir hann.
„Við ætluðum að vinna þennan leik. Við erum búnir að vinna 8 af 10 leikjum í Evrópu á Kópavogsvelli og ætluðum að halda því áfram í dag.“
Riðlakeppni Sambandsdeildarinnar er spiluð fram í desember. Tímabilið lengist því en Gísli er meira en til í það.
„Menn þurfa að fara að afbóka þessar Tenerife ferðir í október,“ segir hann léttur.
Viðtalið í heild er í spilaranum.
