Í Dr. Football fór fram umræða um Rúnar Kristinsson þjálfara KR og framtíð hans. Á samfélagsmiðlum er mikið rætt um framtíð hans sem þjálfara KR.
Stórveldið úr Vesturbænum er aðeins með 4 stig eftir fyrstu sex leiki sína í deildinni. Í gær tapaði liðið 5-0 fyrir Val. Það gæti farið svo að liðið verði í fallsæti þegar þessari umferð lýkur í kvöld með fjórum leikjum.
Stöðu Rúnars er því velt upp. „Þú getur ekki vaknað fúll á mánudagsmorgni og rekið Rúnar Kristinsson, það þarf að vera eitthvað plan,“ sagði Hjörvar Hafliðason í Dr. Football í dag.
Hrafnkell Freyr Ágústsson segir að það muni ekki laga neitt að reka Rúnar. „Það er ekki að fara að laga neitt, hvern eiga þeir að fá í staðinn?.“
Albert Brynjar Ingason telur enga lausn vera í því að reka Rúnar. „EF þeir myndu láta Rúnar fara þá myndi Ole Martin taka við og Pálmi kæmi inn sem aðstoðarmaður, það er það sem ég held að það myndi gerast. Mér finnst ekki að það eigi að gerast,“ sagði Albert.
Ole Martin tók við sem aðstoðarþjálfari KR í vetur og mikið hefur verið látið með hann, Albert bendir hins vegar á þetta.
„Ég held að Ole Martin, það er mikið talað um að hann sé með Rúnari í þessu. Það ætti kannski að skoða það, hann hefur komið með Olav Öby og markvörðinn. Báðir litið illa út, kannski ætti Rúnar að taka í taumana,“ sagði Albert.
