Íþróttavikan hefur hafið göngu sína á nýjan leik en þátturinn verður aðgengilegur á DV.is og í Sjónvarpi Símans. Nýr þáttur verður aðgengilegur alla föstudaga.

Helgi Fannar Sigurðsson, íþróttablaðamaður og sparkspekingurinn Hrafnkell Freyr Ágústsson munu stýra Íþróttavikunni saman. Hjörvar Hafliðason var gestur í fyrsta þætti þeirra félaga.

Nýliðar HK hafa staðið sig ótrúlega vel það sem af er Bestu deildar karla. Liðið er í þriðja sæti með 10 stig eftir fimm leiki. Hefur það meðal annars unnið sigra á Breiðabliki og KR.

„Þetta er frábær byrjun og það sést að Ómar veit nákvæmlega hvað hann er að gera. Ég fagna því. Ómar Ingi er eini þjálfarinn í deildinni sem á ekki leik í efstu deild svo þetta gefur okkur neðri deildar gómunum von,“ segir Hrafnkell og hlær.

„Þetta er gaur sem hefur verið yngri flokka þjálfari hjá HK frá því hann var unglingur sjálfur. Eðlilega hugsa menn: Er hann með þetta á meistaraflokksstigi? Hann virðist alveg vera með þetta. Það er klárt að hann er með plan.“

Hjörvar bendir á góðan eiginleika í fari Ómars. „Hann þekkir alla leikmenn. Ég veit ekki hversu oft ég hef talað við þjálfara í efstu deild á Íslandi sem þekktu ekki leikmenn.

Ég hef margoft talað um fótbolta við Ómar og hann þekkir alla leikmenn. Mér líst alltaf vel á menn sem kunna að þjálfa en eru líka að pæla í þessu.“

Umræðan í heild er hér að neðan.